Showing posts with label Videos. Show all posts
Showing posts with label Videos. Show all posts

Monday, 27 November 2017

தானோட்டி வாகனங்களை பயன்படுத்துவதில் பயணியர் போக்குவரத்தை

தானோட்டி வாகனங்களை பயன்படுத்துவதில் பயணியர் போக்குவரத்தை


தானோட்டி வாகனங்களை பயன்படுத்துவதில் பயணியர் போக்குவரத்தை விட சரக்குப் போக்குவரத்து துறை முந்திக்கொள்ளும் போலத் தெரிகிறது. அமெரிக்காவில் கடந்த அக்டோபர் முதல் வாரத்திலிருந்து, 'எம்பார்க்' நிறுவனத்தின் தானோட்டி லாரிகள், 'பிரிஜிடைர்' என்ற குளிர்பதன பெட்டிகளை ஏற்றிக்கொண்டு, 1,000 கி.மீ., துாரம் சென்று இறக்கிவிட்டு திரும்பி வர ஆரம்பித்துள்ளன.

அமெரிக்காவின் டெக்சாஸ் மாகாணத்திலிருந்து, கலிபோர்னியா மாகாணம் வரையிலான இந்த பயணத்தின் துவக்கத்திலும், முடிவிலும் மனித ஓட்டுனர் தான் ஓட்டுகிறார்.

ஆனால், இடைப்பட்ட துாரத்தில் ஓட்டுனர் சும்மா அமர்ந்திருக்க, எம்பார்க் லாரி தன்னைத்தானே பத்திரமாக ஓட்டிச் செல்கிறது. அடுத்த சில ஆண்டுகள் வரை, லாரியில் ஓட்டுனர் துணைக்கு இருப்பார்.

வெள்ளோட்டம் முடிந்ததும், முழு பயணத்தையும் எங்கள் தானோட்டி லாரியே கவனித்துக் கொள்ளும் என்று அறிவித்திருக்கிறது எம்பார்க்.
சரக்கு லாரி ஓட்டுனர்களுக்கு அமெரிக்காவில் பற்றாக்குறை ஏற்பட்டிருக்கிறது. மேலும், அனுபவமுள்ள லாரி ஓட்டுனர்கள் வயதானவர்கள் என்பதால், ஆண்டுதோறும் கணிசமானோர் ஓய்வு பெற ஆரம்பித்துள்ளனர்.

இதனால் தான், கூகுளின், 'வேமோ, டெஸ்லா, உபேர், வால்வோ, டெய்ம்லர்' ஆகிய பல வாகன தயாரிப்பாளர்களும், தானோட்டி லாரிகளை சாலையில் இறக்கி விடும் சோதனைகளில் மும்முரமாகியுள்ளனர்.
இயற்கை உலகம்: இலை போல இறக்கை!

இயற்கை உலகம்: இலை போல இறக்கை!


இலைகளைப் போன்ற இறக்கைகளைக் கொண்ட புதிய வெட்டுக்கிளி இனத்தை, விஞ்ஞானிகள் கண்டறிந்துள்ளனர். கனடா மற்றும் பிரிட்டனைச் சேர்ந்த உயிரியல் வல்லுனர்கள் கண்டுபிடித்துள்ள இந்த புதிய வகை பூச்சிகள், மேற்கு ஈக்வடார் முதல், மத்திய கொலம்பியா வரையில் உள்ள காடுகளில் வசிக்கின்றன. 

காடுகளின் தரைகளில் கிடக்கும் உலர்ந்த இலைகளின் மத்தியில் இந்த வெட்டுக்கிளிகள் இருக்கும்போது, அவற்றை உண்ண வரும் விலங்குகளுக்கு தெரிவதில்லை. ஏனெனில், இப்பூச்சிகளின் இறக்கைகள் உதிர்ந்து உலர்ந்த இலைகளைப் போலவே இருப்பது தான்! 
விரைவில் மட்கும் பிளாஸ்டிக் பாட்டில்!

விரைவில் மட்கும் பிளாஸ்டிக் பாட்டில்!


பிளாஸ்டிக் கழிவுகள் ஆறு, ஏரி, கடல் போன்ற நீர்நிலைகளை மாசுபடுத்தி வருகின்றன. மறு சுழற்சி முறையை பரவலாக கடைபிடிக்கும் பிரான்ஸ் போன்ற நாட்டில் கூட, பெட்ரோலியப் பொருட்களால் தயாராகும் பிளாஸ்டிக் பொருட்களில், 45 சதவீதம் மறுசுழற்சி செய்யப்படாமல் நேரடியாக குப்பைக்கூளமாக நீர்நிலைகளில் கலந்து சுற்றுச்சூழலை பாதிக்கின்றன.

இந்த நிலையில், பிரான்சின் முன்னணி பிளாஸ்டிக் பாட்டில்களைத் தயாரிக்கும், 'லைஸ் பேக்கேஜிங்' அண்மையில், 'வேகன் பாட்டில்' என்ற புதிய வகை பிளாஸ்டிக் பாட்டில்களை அறிமுகப்படுத்தி இருக்கிறது.

வேகன் பாட்டில்கள் உயிரி பிளாஸ்டிக்குகளால் தயாரிக்கப்பட்டவை. அதாவது, இந்த வகை பிளாஸ்டிக்குகள் இயற்கையான பொருட்களைப் போலவே, மண்ணில் புதைந்ததும் விரைவில் மட்கிப் போகும் தன்மை உடையவை. வேகன் பாட்டில்களின் மூடி, அதன் மேல் ஒட்டப்படும் லேபிள் ஆகியவையும் எளிதில் மட்கும் தன்மை உடையவை என்கிறது லைஸ் பேக்கேஜிங்.

எத்தனை நாட்களில் வேகன் பாட்டில் மட்கிப் போகும்? வெறும், 90 நாட்கள் போதும் என்கிறது அந்நிறுவனம். அதே சமயம், வேகன் பாட்டில்களை பல முறை மறு சுழற்சி செய்யவும் முடியுமாம்.

சுற்றுச்சூழலுக்கு கேடு விளைவிக்காத பொருட்களைத் தயாரிக்க, ஐரோப்பாவில் ஒரு பெரும் இயக்கமே ஆரம்பித்திருக்கிறது. வேகன் பாட்டில் அதன் முக்கிய மைல்கல் எனலாம்.
வைட்டமின்களை அள்ளித்தரும் தங்க உருளை கிழங்கு!

வைட்டமின்களை அள்ளித்தரும் தங்க உருளை கிழங்கு!


பல வளரும் நாடுகளில், 'வைட்டமின் ஏ' சத்து குறைபாடுள்ளவர்கள் இருப்பது இன்றும் நீடிக்கிறது. இதை தடுக்க, இன்று அன்றாட உணவாகிவிட்ட உருளைக் கிழங்கை பயன்படுத்தலாம் என்று கருதுகின்றனர் விஞ்ஞானிகள்.

அமெரிக்காவின் ஒஹையோ மாகாண பல்கலைக் கழகம் மற்றும் இத்தாலிய பல்கலைக் கழக விஞ்ஞானிகள், மரபணு திருத்தம் மூலம் பொன்னிற உருளைக் கிழங்கை உருவாக்கி உள்ளனர்.

இந்த புதிய வகை உருளைக் கிழங்கை வெட்டிப் பார்த்தால், வழக்கமான வெளிர் நிற சதைப் பகுதிக்குப் பதிலாக, பொன் மஞ்சள் நிறத்தில் சதைப் பகுதி இருக்கிறது.

அது மட்டுமல்ல, இதில், 'புரோ வைட்டமின் ஏ' மற்றும் வைட்டமின் ஆகிய சத்துகள் செறிவாக உள்ளன. 'புரோ வைட்டமின் ஏ'வைத்தான் நம் உடல் செரிமானம் செய்து, 'வைட்டமின் ஏ' சத்தாக மாற்றிக் கொள்கிறது.

'வைட்டமின் ஏ' சத்து, இளம் வயதில் கண் பார்வை பறி போவதைத் தடுக்கக்கூடியது.
மேலும், தொற்றுகளை எதிர்க்கும் சக்தியை உடலுக்குத் தருகிறது.
கருவுற்ற பெண்களுக்கு ஆரோக்கியமான குழந்தையைப் பெறவும், 'வைட்டமின் ஏ' முக்கியம்.'வைட்டமின் இ' சத்து நரம்புகளுக்கும், தசைகளுக்கும் வலுவைத் தர உதவுகிறது.

பொன்னிற உருளைக் கிழங்குகள் இத்தகைய நன்மைகளை எளிய மக்களுக்கும் கொண்டுபோய் சேர்க்க உதவும் என்று விஞ்ஞானிகள் நம்புகின்றனர்.